كما تخيّلها الرسّام
ثمانية مواضيع خلاقة تجعلك ت...
مسرحية هدية الميلاد للأولاد
الهدف: سكتش ميلادي يركز على هدية يسوع لنا
الفكرة: مجموعة من 5 أولاد يتكلّمون عن تمضية الميلاد قبل بيوم من المناسبة
العمر: بين 5 و10 سنوات
الوقت: 10 دقائق
المكان: داخلي وفيه مسرح
الحاجيات والديكور: (1) ألعاب متنوعة الحجم (2) هدية كبيرة الحجم (3) مذود صغير فارغ (4) إنارة مناسبة
المقطع الكتابي: شكرا لله على عطيته التي لا يعبر عنها. 2 كورنثوس 9: 15
الشخصيات: 5 أولاد وشخصيّة يسوع
تنويه (تأليف): جنى الغصين (Jangos7@hotmail.com )
المشهد
مسرح عبارة عن غرفة ألعاب والهدايا منتشرة... وهناك هدية كبيرة الحجم تكفي لوضع مذود فيها... الهدية على يمين المسرح وهي مغلقة من الأمام، ومفتوحة من الخلف وفيها مذود صغير فارغ وإنارة
المسرحية
الولد الأوّل: شوفوا أنا شو اشترولي أهلي مبارح! (يريهم ثيابه) أنا رح البسن بكرا تا كل الناس يشوفوا قدّيشن حلوين!
الولد الثاني: انا مش مصدّق يصير بكرا تا شوف كل العيلة!!! منقعد مع بعضنا منحكي، منلعب، منضحك! ومناكل أكل كتير طيّب، صرلي كتير زمان ما شفتون! (مقطع الأغنية: الأعياد منشتري فيها...)
الولد الأول:( الأعياد منشتري فيها تياب جديدة وحلوي كتير
الولد الثاني: وبتجمع العيلة كلّا حتى لو عددها كبير) ٢
الولد الثالث: أنا ناطر بكرا العيد لأنو بيوصلني هدايا كتير، منفتحون ونمبسط! أنا أحلى شي عندي الهدايا!! (القرار: انا ناطر تيجيني هديّة...)
(انا ناطر تجيني هديّة لو كانت بسيطة كتير
حتى لو يللي هاديني مانو بالهدايا خبير) ٢
الولد الرابع: انت ما بيهمّ الا حالك؟؟ شوف أنا شو عملت: حضّرت هدايا لقرايبيني وأصحابي، وحضّرت علب هدايا للفقرا تا حس معون، هيك الله بيكون مبسوط مني... (المقطع الأوّل: مع إني بحب الهدايا ما رح إنسى...)
(مع إني بحب الهدايا ما رح إانسى اهدي الغير
مش بس رح فكّر بحالي في غيري محتاج فقير) ٢
الولد الخامس: برافو عليك، بس أنا أحسن منكون كلكون لأنّي فكّرت بصاحب العيد – يسوع- وعم حضّرلو أحلى هديّة
الجميع: شو هيي؟
الولد الخامس: الهدية؟ أكيد مش لعبة أو أكل أو تياب. بقدّملو قلبي، وحياتي ومستقبلي تا يكون هوي المسؤول عنّون! (أنا بدي اهدي إلهي...)
(أنا بدي اهدي إلهي تا عبّر عن شكر جزيل
عَ محبتو وعنايته فيني وقلبو يللي كتير كبير) ٢
فجأة، يظهر يسوع أمامهم فيتفاجأون...
يسوع: ما تخافوا! أنا جيت كرمال خبّركن إني كتير بحبكن! وكنت عم بسمع حديثكن ومبسطت كتير! بتعرفوا انو أنا كتير بفرح لما تشتروا تياب جديدة، وبحب كتير يوصلكن هدايا حلوي، كمان بفرح بجمعة العيلة والشركة مع بعضهم والودّ. وبشعر بلذة كبيرة لما حدا يصلي ويحكي معي، ويقدّملي قلبو وحياتو. هون مش بس بفرح، بل بيكون في حفلة بالسما لرجوع شخص بالتوبة.
ولكن، خليني وضّحلكون شي: عيد الميلاد الي انتو عم تحتفلوا فيه هوي هديتي أنا لالكن. ايه مزبوط متل ما سمعتوا: ولادتي على الأرض هيي هدية لالكن لأنو هي بداية الرحلة للخلاص! (يُدير الهدية الى الجنب الآخر حيث يظهر المذود) أنا ولدت عالأرض مثلكم، وعشت مثلكم بكل التجارب كرمال قدّم لكم أغلى هديّة وهيي الخلاص! أخدت كل أخطاءكم ت تعيشوا بالنعمة، وتكونوا دايماً معي!
الولد الأوّل: شكرا كتير يا يسوع، أنا ولا مرة كنت عارف انو هيدا معنى العيد
الولد الثاني: هيدي أعظم هدية ممكن احصل عليا
الولد الثالث: شي كتير بيريح لما أعرف انو في حدا شال أغلاطي عني
الولد الرابع: أنا كتير بحبك يا يسوع وبدي ياك تولد بحياتي كمان تا عيش معك دايماً
الولد الخامس: أنا بكرا رح خبّر كل العيلة عن معنى الميلاد الحقيقي!
المقطع الأخير: (كل ولد يأخذ عبارة للترنيم) (ويرنّم الجميع القرار الأخير)
الهديّة العظيمة هيي من ربي إله الخير
يللي أخد قصاصي منّي وأنا كنت بخطيتي أسير
حماني بموتو وقيامتو من أذى العدو الشرير
وحملني بكف الراحة وجعلني ابن وأمير
قرار أخير
(أنا هلأ أخدت هديّة عجيبة وعظيمة كتير
من ربي واله خلاصي ومش قادر على التعبير) ٢
(مش قادر على التعبير) ٢
تعديل
أطلب من الأحداث بالقيام بالتدريب وتحضير الديكور وتقديم المسرحية
يمكن إضافة بعض الجُمل لتوصيل الأفكار
ملاحظة
مرفق كلمات المسرحية للتدريب
مرفق اللحن الأساسي لتدريب الأولاد عليه
