يوسف كان عندو اخوة

الهدف: قصة يوسف على طريقة الحان 'الراب'        

العمر: 8 وما فوق       

تنويه (تأليف): بهاء بدر (bahaabadr@gmail.com)

1.          

يوسف كان عندو إخوة

وإخوتو كانوا كتار كتير

جاد، زبولون ولاوي

دان، يساكر، أشير

يهوذا، شمعون، نفتالي

ورأوبين خيّو الكبير

وبعدين إجا بنيامين

وصار هّوي الخي الصغير

2.          

وصار يحلم هالأحلام

ويخبّر إخوتو المنام

ويقلّن إنو المقام

ل بيلبقلو هوّي الأمير

3.          

ساعة نجوم وساعة شمس

يخبّر بالعالي وبالهمس

عن أحلامو من يوم أمس

اللي آخدي عقلو والتفكير

4.          

لكن بيوم من الإيام

رميوه إخوتو ببير نشفان

ومن الغيرة باعوه كمان

لحتى خيّون عبد يصير

5.          

وعند بيت فوطيفار

بمصر إشتغل ليل نهار

وقدّام مرتو لأ ما إنهار

رغم حبسو بالأخير

قرار 1

(كان الرب عندو تدبير

وخطة ليوسف بالحياة

هوي إلهو القدير

اللي قادو حتى الممات)2

6.          

وبالسجن إجا الخبّاز

يحكيلو حلمو بإيجاز

لكن يوسف بإمتياز

فسّرلو حلمو الخطير

7.          

وساقي الملك بحلمو نغمّ

وصار يدب بقلبو الهمّ

ويوسف كان كتير مهتمّ

وقدّملو أحلى تفسير

8.          

وقلّو أوعا تنساني

بدّي حمّلك أمانة

إحكي الملك من شاني

حتى بطّل هون أسير

9.          

الساقي بالأول نساه

وترك يوسف بأساه

وما تذكّر حتى مولاه

حلم بحلمو الشهير

10.      

حلم الملك كان رهيب

وتفسير يوسف كان عجيب

ولو ما الرب عندو ترتيب

ما كان صار أكبر وزير

11.      

وهيك الرب مدّو بالعون

وخلّاه يصير تاني فرعون

والشّر ل صابو بعيد من هون

تحوّل لخير وفير

قرار 2 

(كان الرب دايمًا مع يوسف

وكان يقودو كل الدرب

هوي نجّح كل أعمالو

عند الرب ما في شي صعب)2

12.      

وإنت إذا بدّك تنجح

خلّي ليسوع مطرح

حتى بكلّ لحظة تفرح

وتتغيّر كل التغيير

13.      

دايمًا إتكل على الرب

هوّي الراعي وهوّي الأب

قلبو مليان بالحب

وأعظم منو ما بصير

14.      

يسوع ال كرمالك مات

إذا على قلبك فات

بخلّص بيعطي حياة

من الخطية والتعتير

15.      

توب اليوم سلمو إيامك

هوّي رح يمشي قدّامك

عندو بتلاقي سلامك

وبإيدو وحدو المصير

ملاحظة

مرفق ترنيمة 'يوسف كان عندو اخوة' - موسيقى، لحن وكلمات MP3