عم اسمع صوتين

العنوان: سكتش - الجسد والروح

الهدف: معرفة فكرة عن صراع الجسد والروح، ما يجعلنا نفهم نفوسنا والآخرين

العمر: 8 سنوات وما فوق

الوقت: 10 دقائق

الحاجيات: طاولة وكراسي (المشهد في كافيتيريا)

الشخصيات: 5 ممثلين

1.     سعيد

2.     طارق

3.     الجسد (شخص أول غير مرئي بالنسبة لطارق... دائمًا يهمس في أذن سعيد)

4.     الروح (شخص ثاني غير مرئي بالنسبة لطارق... دائمًا يهمس في أذن سعيد)

5.     فادي

 تنويه (تأليف): جنى الغصين (Jangos7@hotmail.com )

الأحداث

(مؤمن اسمه سعيد يجلس في كافيتيريا في وقت الاستراحة من العمل... يمر أحد زمالئه طارق من جنبه ويجلس على طاولة قربه (

سعيد: واو ليك شو مرتب! حلوين تيابو وستيلو

الجسد: اكيد حلوين ما أصلا كل قطعة حقها بلوي.. ما أهلو مزنغلين! مش متلي ع قدو.. نيالو.. لو أنا وضعي متلو شو كان صار بس هيك الرب بدو ياني اتعتّر بالحياة

الروح: شو هالافكار! ايه مرتب هيدا وضعو بس نشكر الرب... أنا ولا مرة عزت حدا.. وعندي خلاص بالرب.. ما لازم أحسد حدا...

سعيد: بشكرك يا رب على كل شي...

الجسد: بس أصلا أكيد تيابو تقليد مبينين مش أصليين... ولابس كعب باجرو تا يبين أطول...و كأنو عامل عملية تجميل بوجو.. .

(يسلّم عليه (

طارق: كيفك؟ لازم احكيك بعد دقائق

سعيد: ايه تكرم أهلا ...

الجسد: كيفك! ليش من ايمتى بيسلم عليي.. أكيد بدو شي! مصلحجي.. أصلا ... قال شو؟؟ مبارح مر جنبي ...عمل حالو مش منتبه وكّمل لا دريان ولا معو خبر.

الروح: شو بني أنا.. ولو هيدي أفكار شريرة

الجسد: ليش أفكار شريرة... هيدا تحليل والرب عطاني عقل وحكمة كرمال ما ينضحك عليي...

الروح: هيدي الافكار الشريرة ناتجه عن حقد ... من لما صار الحادث مبارح وأنا لازم سامحو حتى أرتاح...

الجسد: مش ممكن ... هيك بكون أهبل قدام الناس... أصلا يوحنا المعمدان قال لغير المؤمنين: يا أولاد الافاعي وكمان بولس قال لرئيس الكهنة: سيضربك هللا أيها الحائط المبيّض' بدو هيك بهدلة؟

(يأتي طارق)

طارق: عفواً كنت مضطر خلّص تلفوني قبل ما احكيك ... بدي قلك أول شي ما تواخذني يمكن ما معك خبر اني مبارح نكعتلك السياره شوي كنت مستعجل طلعت من الشغل...

الجسد: فناص ... عملها عن قصد ... بس خليني طبطبلو...

سعيد: بسيطة حبيبي ولا يهمك! اصلا ما انتبهت أنا!

الروح: وعم كذّب كمان؟

طارق: ع فكرة أنا من زمان برتحلك ويقول لازم اتقرّب منك ... بحس عندك ايمان حلو بحب اسمع عنو..

الروح: شفت كانت كل ظنونك مش بمحلّها ...

سعيد: أكيد.. ما عندي مشكلة

طارق: ورح خبرك سر.. انا كنت مستعجل لانو عندي أخ بالبيت عندو مشاكل و بيوقع بالنقطة... وانا بيي متوفي من زمان وصار معو عارض كرمال هيك انا شوي بعيد عن الناس بالشغل بس أكيد خلي الخبر بيناتنا

سعيد: ما يهمك هون حفرنا وهون طمينا...

طارق: شكرا الك ... ع فكرة أنا رح اتحمل تكاليف السيارة بس تظبطا

سعيد: له له ... مش مبين شي

(يخرج طارق)

سعيد: يا عيبشوم عليي! عنجد ظلمتو.

(يأتي فادي (

فادي: مراحب ... مبين هون أستاذ سعيد

(يجلس (

الجسد: خبرو آخر خبرية!

سعيد: احزر شو! شفت هيدا طارق اللي معنا بالشغل!!

فادي: هيدا لمناخيرو لفوق والغريب الاطوار؟؟

سعيد: هوي هوي! اسمع آخر خبرية عنو...

فادي: شو هيي!!

الروح: اوعى! بلشنا نميمة !

الجسد: له ولو عم نتسلى ـ وأصلا فادي بيحمل سر!

الروح: هيدا نميمة واغتياب وفضيحة وكذب ... كمان انت وعدتو

(عراك بين الروح والجسد)

سعيد: شو صرلي أنا (يخجل من نفسه (

فادي: يلال خبرني تحمست! عندو شي مصيبة؟!

سعيد: صرنا أصحاب أنا وياه! فهمناه غلط!

فادي: هيدا آخر كلام بتوقعو منك شو اللي غيرلك راسك فجأة

سعيد: حكيت معو وكان كتير لطيف... وبعدين عندو ظروفو حتى انو ما كتير بينخرط معنا!

فادي: شو هالظروف تا بيتكبر عالناس؟؟!

سعيد: مش تكبر لكن عفوية بسبب العجلة الدائمة بحياتو لكن قلبو طيب وبيحب يعرف الحقيقة!

فادي: ولشو العجلة!!

سعيد: (ينكزه الجسد) طيّب رح خبرك! بس خللي السر بيناتنا...

)يخبط الروح على وجهه(

النهاية

العبرة

كم مرّة أصغيت لصوت الجسد؟

كم مرة تغلّب الجسد في حياتك؟ هل تترك مجالا للروح أن يتصرف في أمورك اليومية؟

مكتوب

وَإِنَّمَا أَقُولُ: اسْلُكُوا بِالرُّوحِ فَلاَ تُكَمِّلُوا شَهْوَةَ الْجَسَد. لأَنَّ الْجَسَدَ يَشْتَهِي ضِدَّ الرُّوحِ وَالرُّوحُ ضِدَّ الْجَسَدِ، وَهذَانِ يُقَاوِمُ أَحَدُهُمَا الآخَرَ، حَتَّى تَفْعَلُونَ مَا لاَ تُرِيدُونَ (غل 5: 16)

ما الخطية التي يستخدمها ابليس دائما للتغلب على الروح؟ هل تصون لسانك أم يتحكم بك الجسد؟

صلّ مع داود: 'اجْعَلْ يَا رَبُّ حَارِسًا لِفَمِي. احْفَظْ بَابَ شَفَتَيَّ.' (مز 141: 3)

تعديل

يمكن تضخيم الحوار والحركة بين الروح والجسد ويمكن إضافة عراق خلف سعيد