أحلى علقة

أحلى علقة

تنويه: إيلي الصليبي ( esaliby68@gmail.com)

المشهد الاول:  (عائلة عباس، وعائلة كرباج وبنتن صوفي، الارملة نعّوس وابنها فايق)

(صورة السيد فاضل موجودة بالصالون، بشكل كبير)

(المسؤول أمين ناطر الضيوف، بيدق الباب)

أمين: الهيئة بلشوا يوصلوا ضيوفنا.. (بيفتح الباب)

امين: يا اهلا وسهلا... تفضلوا

عيلة عباس: مرحبا، حضرتك مستر أمين؟

امين: نعم

مستر عباس: أنت المسؤول عن القصر؟

امين: نعم...مين حضرتكن؟

مستر عباس: نحن عيلة اباس ونحن جايين من استراليا...

امين: عيلة عباس، يا اهلا وسهلا، تفضلوا الحمدالله على السلامة

مدام عباس: نحن كتير بكينا لما سمعنا الخبر، كان السيد فاضل انسان كويس، يا ضيعانو، (تبكي)

مستر عباس: الله يرحمو

أمين: انتو بتعرفوه للسيد فاضل؟

مستر عباس: لا ابداً، نحن خلقنا باستراليا، بيو وبيي اولاد العم، ونحن ما رجعنا جينا على لبنان ابداً...

مدام عباس: لما سمعنا الخبر، زعلنا كتير كتير، كأنو منعرفو من زمان...

مستر عباس: لما وصلتنا الدعوة من المحامي، دغري جينا باسرع ما يمكن...

مدام عباس: ما جينا كرمال الوصية ابداً... بس جينا لحتى نعزيكن...

امين: تعزونا!!!

مستر عباس: قصدها نعزيك، نعزيك انت...

امين: بالصراحة، انا لازم عزيكن، لانكن انتو يلي بتقربوه، مش انا...

مدام عباس: آه، مظبوط، دخلك في حدن غيرنا من القرايب جاي؟؟

أمين: حسب الأسماء يلي عطاني اياهن المحامي، نعم في...

(بيدق الباب)

امين: يا اهلا وسهلا... تفضلوا

عيلة كرباج: مرحبا، حضرتك...؟

امين: نعم، أنا أمين المسؤول عن القصر... مين حضرتكن؟

مستر كرباج: نحن عيلة كرباج ونحن جايين من فرنسا... مدامتي، وبنتي...

أمين: أهلا وسهلا... شو الاسم demoiselle

صوفي: صوفي (بكل نعومة)

أمين: شوفي؟ ما في شي... لحد هلق كل شي منيح... ما في شي ابداً... انتو في شي؟؟

مستر كرباج: اسمها اسمها صوفي...

امين: آ صوفي...، يا اهلا وسهلا، تفضلوا الحمدالله على السلامة

مدام كرباج: نحن بكينا لما سمعنا الخبر ما صدقنا، قلنا مش معقول السيد فاضل مات، يا ضيعانو، (تبكي) كان كتير منيح وبيحب كل الناس...

مستر كرباج: انشالله تكون نفسه بالسما

أمين: انتو بتعرفوه للسيد فاضل؟

مستر كرباج: لا ابداً، نحن خلقنا بفرنسا، امي وامو اولاد العم، ونحن ما رجعنا جينا على لبنان ابداً وهيدي اول مرة منجي لهون...

أمين: يا اهلا وسهلا فيكن... (مقلداً لهجتن)... بدي عرفكن على مستر عباس ومدام عباس هني جايين من استراليا وهني بيقربوا كمان السيد الفاضل...

عيلة كرباج: تشرفنا... (بعدم اهتمام)

مدام كرباج: مستر أمين، بعد في حدن من القرايب؟

أمين: بعد في عيلة نعوس...
 

(بيدق الباب)

أمين: اكيد هودي هني... (يفتح الباب)

مدام نعوس: مرحبا (بلهجة اهل بشري) هون قصر السيد فاضل؟؟

أمين: نعُم...

مدام نعوس: انا مدام نعوس... وهيدا ابني فايق...

فايق: مرحبا عمو

أمين: يا اهلا تفضلو تفضلو... (بيعرفن على عيلة عباس وعيلة كرباج)

مستر كرباج: مستر أمين، ما قلتلنا شو بيقربوه للاستاذ فاضل؟

مدام نعوس: جدي وجدو للاستاذ فاضل كانوا متل الاخوة...

مدام كرباج: يعني ما في قرابة... وليش هني هون؟؟؟

مدام نعوس: الاخوة اقرب من القرايب المهاجرين يا مدام كرباج

فايق: نحن الاصل، ما يكون طربوش جدك معلق على برج ايفل...

أمين: يا جماعة... وصية السيد فاضل بتقول انو هودي الاسماء لازم يكونوا موجودين اليوم... والمحامي صار واصل... كيف بتحبوا القهوة؟

مدام عباس ومستر عباس: مرة

مدام كرباج ومستر كرباج: وسط

مدام نعوس وابنها فايق: (بتطلع فين وبتقول) حلوة

أمين: ولعت...

مدام عباس: دخلك مطول هالمحامي تيجي؟؟؟

أمين:  المحامي، ما بيتأخر ابداً عن مواعيدو... صار واصل

مدام عباس: لانو القعدة مش كتير ظابطة هون... (تنظر الى الاخرين)

مدام كرباج: ما معقول كتير تأخر المحامي

مستر كرباج: كتير هيك، بس... بتحرز النطرة...

مدام عباس: اكيد بتحرز يا مستر كرباج

مستر عباس: المهم يوصل بقى المحامي ويطلعنا على الوصية تنشوف اذا بتحرز...

أمين: ولو يا جماعة، انتو بتعرفوا انو السيد فاضل كان يملك ثروة كبيرة

مدام نعوس: كان شخص آدمي كتير ويحب الكل ويساعد الكل، الله يرحمو...

مدام عباس: دخلك مستر أمين... خبرنا شوي اكتر عن ثروة السيد فاضل...

امين: بدك تعرفي عن السيد فاضل او عن ثروة السيد فاضل؟؟

مدام عباس: السيد فاضل سامعين عنو... بس بيهمنا ثروته ما منعرف كتير عنها، بيقولوا انو كتييييير كبيرة...

أمين: بتعرفي يا مدام عباس انا ما بعرف كل شي عن ثروة السيد فاضل، بس يلي بعرفوا انو كتير غني... اراضي وشركات واوتيلات ومش بس بلبنان، عندو اوتيلات بباريس وبلندن وبنيورك...

مدام كرباج: سمعت (لمستر كرباج)... قلتلك انو عندو ممتلكات برا كمان...

مستر كرباج: طيب...  السيد فاضل ما عندو اولاد؟

أمين: يا مستر كرباج، السيد فاضل ما تزوج...

مستر عباس: آه... منيح يلي ما تزوج، ولشو الزواج...

مدام عباس: ولشو الزواج في احسن منها واحد يضل أعزب...

 (بيدق الباب)

أمين: اكيد وصل السيد دحروج (بيفتح الباب)

دحروج: (يدخل مسرعاً واضعاً نظارات، والكل يقف) مرحبا، كلن وصلوا يا أمين... (ناظراً الى الجمهور)

أمين: نعم...

دحروج: وينن؟؟؟

أمين: وراك يا مستر دحروج... (بيعرفن عليه)

دحروج: ما عندي وقت ضيعو... يا أمين جيب الوصية...

(أمين بيجيب صندوق مسكر بيقفل، وبيفتحو قدام المحامي)

(موسيقى ترقب)

(بكل تأني يأخذ المفتاح ويبدأ بفتح الصندوق، وثم المكتوب الذي يحتوي على مكتوب اصغر منه وهنالك ورقة مكتوب عليها ملاحظة، والكل عيونن على الصندوق)

مدام كرباج:  لو بتفتح هالصندوق متل ما بتمشي يا مسيو دحروج...

مدام عباس: لو شوي بتدحرج أسرع...

أمين: روقوا شوي على المحامي، زلمي كبير بالعمر...

دحروج: في ملاحظة موجودة باول ظرف، وبتقول:.... آ....آ... احم... أحم...

مستر كرباج: خلّصنا بقى...

مستر عباس: ولك طلع ضغطي...

دحروج: بتقول الملاحظة: ما بتنفتح الوصية الا بعد 7 ايام من هلق.

الجميع: شوووووو 7 أيام؟؟؟!!!!!

دحروج:  وفي شرط: لازم كل الموجودين يبقوا بالقصر بدون ما يغادروه ابداً، وكل عيلة الها جناح خاص مع خدم وكل شي مأمن. تمتعوا بقصري الكبير وبكتابي يلي بيحكي عن حياتي وعن مبادئي وعن افكاري، ف 7 ايام مبدئياً كافيين تحتى تتعرفو علي. وما تنسوا بالآخر في ثروة كبيرة لكل عيلة نفذت هيدي الشروط واذا حدن غادر القصر بيخسر الورتة.

هيدي هي شروط السيد فاضل وهلق بخاطركن وراح ارجع بعد 7 أيام تأقرأ الوصية. (يغادر مسرعاً)

أمين: مع السلامة حضرة المحامي...

مدام عباس: انا مدام عباس بدي اقعد 7 ايام بالقصر هون مزروبة... بدون shopping

مستر عباس: ما تنسي يا مرتي انو في ورته حرزانة، أخيراً فتحت بوجنا، وراح نصير أغنيا...

مدام كرباج: انا بدي اقعد هون 7 ايام وبوجي كل الوقت بيت نعوس

فايق: ما يكون مش عاجبك بيت نعوس...

مستر عباس وكرباج: ليك ليك ملا علقة

مدام نعوس: 7 ايام مزروبة هون بعيدة عن الضيعة... ليك ملا علقة شو بعمل بالبقرات؟؟

فايق: شو بدكن أحلى من هيك علقة يا جماعة؟ علقة بقصر، مش بعجقة سير...عنجد انا حبيت، هيد أحلى علقة علقتها بحياتي...

أمين: طيب هلق تفضلو راح دل كل واحد على جناحو...

فايق: أمين... هيدا هوي كتاب السيد فاضل؟

أمين: نعم هيدا الكتاب...

فايق: أنا حابب اتطلع عليه

أمين: انا بنصح الكل يقرأوا هيدا الكتاب. أصلاً هيدي هي وصية السيد فاضل،  وراح يكون في كتب للكل بكل جناح.

 بيت عباس هيدا هوي جناحكن... تفضلوا على آخر الزاروب وعلى اليمين

مستر عباس: شكراً

أمين:  بيت كرباج هيدا هوي جناحكن، تفضلوا... تفضلوا على آخر الزاروب وبالنص

مدام كرباج: بدي اسألك يا أمين... (بتاخد أمين على جنب)

امين: نعم

مدام كرباج: هلق جناحنا متل جناح بيت نعوس؟؟؟

أمين: نعم أكيد...

مدام كرباج: معقووووووووول!!!!

أمين: بالقصر هون كلكن عندكن نفس الامتيازات، ونفس الخدمات

مدام كرباج: ما عم صدق... ليك ملا علقة...

مستر كرباج: كلن 7 أيام وبيقطعو... بعدان اجا الفرج يا مرتي، صحيح نحنا مرتاحين، بس  في ورته كبييييييرة ولك فتحت بوجنا...

أمين:  بيت نعوس تفضلوا هيدا جناحكن... تفضلوا على آخر الزاروب وعلى الشمال

مدام نعوس: معقولي بعد كل هالفقر نصير أغنياء وزوّج هالصبي، متل كأنو عم بحلم، فايق...

فايق: نعم يا امي

مدام نعوس: نكذني تشوف بلكي عم بحلم...

فايق: له كأمي ما أنا معك وأنا فايق...

(يبقى أمين وحدو على المسرح)

أمين: هيئتها راح تكون مهمة صعبة... بس يلا كلها 7 أيام ومنخلص...

(انتهاء المشهد الاول واطفاء الانوار)

 

 

المشهد الثاني:

(اضاءة الانوار ويكون أمين وحده بالمسرح)

مدام عباس: لا لا لا لا..... (وتخرج على المسرح) لا... مش معقول يا مسيو أمين

أمين: شو في شو في يا مدام عباس؟

مدام عباس: معقول هيدا الشي!؟

أمين: شو؟

مدام عباس: معقول ما فينا نطلع من القصر ونعمل shopping ؟؟

أمين: بعدنا بأول يوم يا مدام عباس، وبعدان بعدا الساعة ... 7 الصبح...

مستر عباس: (راكض وراها) معقول هيدي الزربة يا مستر أمين؟؟

مدام عباس: مش مقبول هيك كأنوا مقطوعين عن العالم...

أمين: يا مدام عباس هيدي وصية السيد فاضل...

مدام عباس: صحيح عايشين بقصر، بس مقطوعين عن العالم، معقوووووووووووول...

مستر عباس: كلن جمعة جايين على لبنان ، راح نقضين محبوسين بهالقصر...

أمين: يا مستر عباس ومدام عباس روحوا برموا بهالقصر، ونزلوا على الجينانات ، وتمتعوا بممتلكات السيد فاضل، هيدا امتياز الكن... وما تنسوا في ورتة كبيرة وأهم بكتير من كل العالم برا... بعدان ممتلكات السيد فاضل ما فيكون تقارنوها بكل ممتلكات العالم...

مستر عباس: هالقد يا أمين... يعني عم تخلينا نشتاق اكتر لهالورته، ولك قلتلك روقي شوي يا مرتي

مدام عباس: هيدا الشي الوحيد مخليني ساكتا...

أمين: اذا هيك وساكتا كيف لو حكيت...

مدام كرباج: (جاية وعم تقول) لا لا لا لا لا لا... لا

أمين: خير يا مدام كرباج...

مدام كرباج: انا مدام كرباج بدك كل يوم اتصبح ببيت نعوس!؟؟

أمين: هيدي وصية السيد فاضل... بعدان انتِ شفتيا اليوم لمدام نعوس؟

مدام كرباج: لا

أمين: وكيف تصبحتي فيها؟

(يدخل مستر كرباج)

مدام كرباج: هي هي الفكرة يا أمين... الفكرة انو بيت نعوس قاعدين بنفس القصر وعندن جناح متل جناحنا...

مستر كرباج: هيدي زاعجتنا... وبعدان ضروري السيد فاضل يحط هيدا الشرط، ما كنا اخدنا الورته وفلينا وانتهى الموضوع...

أمين: يا مستر كرباج ومدام كرباج روحوا برموا بهالقصر، ونزلوا على الجنينانات ، وتمتعوا بممتلكات السيد فاضل، ائروا بكتابو استفيدوا من هال 7 أيام. وبعدان في ثروة كبيرة ناطرتكن ما تنسوا، ورتة حرازانة...

مدام نعوس: (جاي وعم تقول) لا لا لا لا لا

أمين: حدن يقول آآآ كلو لالالا... خير يا مدام نعوس...

مدام نعوس: (تقف بالنص وتنظر الى الجمهور) اشتقُت للضيعُة...

أمين: نعم؟؟؟

مدام نعوس: اشتقُت للضيعُة...

أمين: حلك يا مدام نعوس؟؟

مدام نعوس: آ هونيك كنت اوعا على صوت الديك، وزقزقة العصافير...

أمين: وعلى شو وعيتي هون يا مدام نعوس؟

مدام نعوس: وعيت على صوت مدام عباس عم تصرخ بدي روح اعمل shopping... شو يعني شوبينغ؟؟؟

مدام كرباج: shopping يعني روح على السوق يا مدام نعوس...

مدام نعوس: آ ... طيب ما تقول بدي أتسوق، مش أحسن؟؟

صوفي: (جاي وعم تقول) شوفي شوفي شوفي

أمين: صوفي، صوفي، صوفي... ما في شي أبداً. ما دام كلكن مجتمعين هلق هون، حابب اسألكن... حدن بلش يئرا بكتاب السيد فاضل؟

الجميع: ولوووووووووووو....

مدام عباس: ولو... ما بعدنا واصلين، أول يوم وبعدها الساعة 7 الصبح، معقووووول

مدام كرباج: كيف بدك ياني  ركّز تحتى أقرا...

مدام نعوس: ليك مسيو أمين،

أمين: نعم

مدام نعوس:  في عندك شي كتاب لجبران خليل جبران؟

أمين: هون في عنا بس كتاب السيد فاضل

فايق: (جاي على المسرح وعم بيقول): واو واو واو (ويدخل المسرح وحامل كتاب السيد فاضل) واو

أمين: لا لا لا ... في حدن قال واو واو واو... شو القصة يا مستر فايق؟

فايق: شو هيدا يا مستر أمين؟ شو هالكتاب هيدا؟ كل الليل انا وعم بقرا فيه...

أمين: عنجد مستر فايق؟؟

فايق: يعني أنا بنصح كل واحد يستفيد من هال 7 ايام ويقرا كتاب السيد فاضل...

مستر كرباج: خلي نصايحك الك يا فايق...

فايق: النصيحة كانت بجمل من زمان...

صوفي: شو يعني جمل؟

أمين: شوفي يا صوفي، جمل هوي حيوان بيعيش هون بالشرق، انتو بفرنسا افيش عندكن منو هيدا

فايق: انا مذهول بقصة حياة السيد فاضل، مع انو بعدني بأول فصل... بس شي كتير حلو، ما بعرف اذا راح لحق خلصو ب 7 أيام... فيني أخدو معي؟؟

أمين: لا يا مستر فايق... هيدا الكتاب بيضل بالقصر وما فيكن تئروه الا هون بالقصر...

صوفي: مسيو أمين، في عندك نسخة بال francais ؟ انا حابها اقرا هالكتاب...

أمين: أكيد، وراح أمنلك نسخة اليوم...

صوفي: Merci

أمين: طيب هلق وقت الترويقة، تفضلوا كل واحد على جناحو...

(يذهب الجميع ويبقى أمين وحدو، بيدق الباب)

أمين: يا هلا...

مستر دحروج: في شي بعت وراي بكير هالقد؟؟؟

أمين: ما حدن لازم يعرف شي أبداً عن الموضوع...

مستر دحروج: أكيد يا إستاذ فاضل ما حدن راح يعرف كون أكيد... حدن شك بشي لحد هلق؟

أمين:  ما حدن بيعرفني الا بيت نعوس... وهني من زمان ما شافوني وما بفتكر راح يعرفوني... وكلن مفكريني أمين المسؤول عن القصر. وما حدن راح يعرف انو انا السيد فاضل.

مستر دحروج: طيب، بخاطرك سيد فاضل

أمين: مع السلامة

(إطفاء الانوار)

 

 المشهد الثالث

(الكل على المسرح، وكل عيلة قاعدة على صوفا، وكل واحد معو بأيدو تلفون)

(يدخل أمين)

الكل: معقووووووول

أمين: شو في؟ شو بكن؟؟

مدام عباس: بس نص ساعة بيطلعنا انترنيت؟؟؟

مدام كرباج: هيدي بعد ما صارت ابداً

مستر عباس: في عنا BUSINESS برا بدنا نتابعو

مستر كرباج: نص ساعة أبداً ما بتكفينا

أمين: هيدي من ضمن شروط يلي حطها السيد فاضل... وبعدان كلن 7 ايام...

مدام نعوس: انا نص ساعة ما بلحق شوف الحيط عندي على الفيسبوك، بدي شوف اذا هالبنت سارة ولدت ام بعد...

مدام كرباج: شو هيدا حيييييط...

مدام نعوس: آ ... ما بتعرفي شو يعني حيط... انتٍ سامعا بالفيسبوك؟؟؟

مدام كرباج: لا لا .... ما بقى ينقعد هون... انا ما بقى فيني أتحمل... زوجي خلينا نفل هلق...

مستر كرباج: طولي بالك يا مرتي... لحقنا وجينا من فرنسا... وبعدان في ثروة كبيرة ناطرتنا...

مدام كرباج: بس هيدا يلي مخليني ساكتا...

مدام نعوس: مدام كرباج... اذا بدك انا مستعدة علمك كيف تستعملي الفيسبوك...

مستر كرباج: لا لا لا... تخنتيا كتير يا مدام نعوس... ما تتعاطي مع مدامتي ابداً...

مدام نعوس: يا ضيعان المنيح...

فايق: لو بتروقوا شوي تنعرف نقرا

أمين: بدي ياكن تتذكروا انو من احدى شروط السيد فاضل أنو تعيشوا هال7 ايام بكل وئام ومحبة لبعضكن البعض...

مدام كرباج: بعد كان ناقص هيدا الشرط من السيد فاضل...

مدام عباس: انا بدي قدم شكوى بخصوص الانترنيت...

أمين: شكوى شو يا مدام عباس وعلى مين؟ على السيد فاضل؟

مدام عباس: معقول بس نص ساعة باليوم؟  بدي قدم شكوى ضد حجز الحريات... هيدي حجز لحريتنا... آ، نعم على السيد فاضل، نحن باستراليا فينا نقدم شكوى حتى على الدولة

أمين: هيدي باوستراليا مش عنا...

مستر عباس: مستر امين نحنا عايشين بالقرن الواحد والعشرين...

أمين: هدفو للسيد فاضل انو ما ضيعوا وقت بهال 7 أيام وانو تتعرفو عليه اكتر وعلى غناه وعلى ابداعاتو وخاصة من خلال كتابو وكمان تتعرفوا على بعضكن البعض ما انتو كلكن قرايب... ورفقى متل الاخوة...

مدام كرباج: مستر أمين... ما تقول قرايب اذا بتريد، ولا إخوة...

مدام نعوس: ليكي يا مدام كرباج... ما راح تمرق القصة الهيئة الا بشي كرباج غير شكل...

مستر كرباج: ما بسمحلك تحكي بهالطريقة مع مدامتي... شو هالعلقة هيدي...

فايق: صدقوني هيدي أحلى علقة... ما عم تعرفوا تستفيدوا منها...

مدام نعوس: أحلى علقة أمي... قوم تنروح على جناح تبعنا...

مستر كرباج: يلا نحن كمان...

مدام عباس: (تقف بالنص وتنظر الى الجمهور) مش معقووول نص ساعة بس انترنيت...

(يخرج الجميع من المسرح)

 

المشهد الرابع

(صوفي وفايق بالصالون، وبتدخل مدام كرباج وبعدان أمين)

صوفي: فايق أنت هون؟

فايق: نعم؟

صوفي: فينا نحكي شوي عن كتاب السيد فاضل؟

فايق: ما عندِك مشكلة تحكي معي!!

صوفي: كان عندي مشكلة، بس حابا اعرف أكتر عن هيدا الكتاب

فايق: وين صرتي بالكتاب؟

صوفي: بالفصل التاني، وأنت؟

فايق: انا بالفصل الرابع...

صوفي: خبرني شوي شوفي بالرابع؟

فايق: بهيدا الفصل حسيت انو الامور المادية بطلت تعنيلي، وحتى مش فرقاني معي الورتة

صوفي: عنجد؟؟

فايق: زادت كتير محبتي للسيد فاضل ويا ريت بعدو عايش تحتى كنت ضل حدو واتعلم منو أكتر..

صوفي: كل ما أسمعك عم تحكي عن هالكتاب، عم يزيد شوقي تحتى ائراه...

فايق: هيك صار معي

صوفي: بس...

فايق: بس شو؟

صوفي: خايفا أوصل لهيدا الفصل وتتغير كل أهدافي وكل خططي للمستقبل...

فايق: ما تخافي لانو راح يكون عندك سلام مش طبيعي...

صوفي: بس أنا عندي أحلام وطموح بدي حققن...

فايق: المشكلة أنو لما نقرا بهيدا الكتاب لازم نصدق كل كلمة فيه ويكون عنا ثقة بالكاتب... وهوي عندو خبرة كبيرة بالنجاح وبتحقيق الاهداف...

 (تدخل مدام كرباج)

مدام كرباج: صوفي qu'est ce que tu fais ici  mais

فايق: آ... ايش قالت؟؟

صوفي: قالت: شو عم تعملي هون؟؟؟ عم نحكي عن كتاب السيد فاضل

مدام كرباج: عم تحكي عن كتاب السيد فاضل مع فايــــــــق (بأستهزاء) ما لقيتي غيرو؟؟

صوفي: أمي كل الناس متل بعض وما حدن أحسن من حدن...

مدام كرباج: صوفي.... أنتِ عم تحكي هيك... صرلك شي، محرورا ماما؟؟

صوفي: لا محرورا ولا شي... بس لما تقري بكتاب السيد فاضل بتبلش تتغير نظرتك للناس...

مدام كرباج: زحتونا بكتاب السيد فاضل... شو كتاب سحر هوي...

(يدخل أمين)

أمين: لا يا مدام كرباج، هيدا منو كتاب سحر، هيدا كتاب حياة السيد فاضل

مدام كرباج: طيب بس ليش الناس عم تتغير بس تقرا فيه؟ صوفي ما كانت هيك أبداً...

أمين: اعمالو يلي كلها محبة وإهتمام وتضحية، وكلماتو يلي كلها مليانة حكمة، هي يلي بتأثر بالناس يلي بيقروا الكتاب ووصيتو للسيد فاضل انو الكل يئروه، الكل يعني الكل

مدام كرباج: راح بلش ائرا فيه، بس ما فينا نعدل شوي بهالوصية يا مستر أمين ونخلص بقى ونفل من هون؟

أمين: وصية السيد فاضل ما بتتغير أبداً، انتو لازم تتكيفوا معا...

مدام كرباج: نحن لازم نتكيف معا؟!

أمين: نعم

مدام كرباج: اسمحلي قلك انو السيد فاضل، واحد أناني

أمين: أناني!!! أنا آآ ... السيد فاضل (يدل على الصورة) أناني؟؟

مدام كرباج: نعم، واحد ما بيهمو الا قوانينو

أمين:  وشو كمان؟

مستر كرباج: آخر هم عندو شو عم نعاني هون

أمين: آ... وشو كمان؟

مدام كرباج: واحد قاسي

أمين: آ... شو كمان؟

مستر كرباج: واحد دكتاتوري

أمين: آ... شو كمان؟

مدام كرباج: آآآآ بيكفي

صوفي: ماما، بابا: انتو مش عارفين حالكن شو عم تحكوا

فايق: بس تبلشي تئري راح تتغير كل حياتك...

مدام كرباج: أنت ما تتدخل فايق...

صوفي: ماما

(تخرج مدام كرباج من المسرح مع مستر كرباج)

فايق: ما تخافي صوفي، أكيد راح يتغيروا بس يبلشوا يئروا الكتاب.

(تخرج مدام كرباج من المسرح مع مستر كرباج)

 

 

 

المشهد الخامس

(متسر عباس ومدام عباس بالصالون لوحدن قاعدين  وعلامات التوتر بادية علين)

مدام عباس: Cherie

مستر عباس: نعم Cherie

مدام عباس: هيدا خامس يوم

مستر عباس: آ نعم صرلنا خمس ايام

مدام عباس: عم يختر على بالك يلي عم يختر على بالي؟

مستر عباس: عم يختر على بالي... سندويش شورما، وانتِ؟

مدام عباس: اوف بيضل بالك ببطنك، عم يختر على بالي نقوم نفل من هون

مستر عباس: Cherie صار قاطع 5 ايام روقي بعد في يومين

مدام عباس: حاسا حالي راح اختنق، شو هالعلقة هاي، العالم عم يمشي ونحن واقفين، كأنو واقف الزمن فينا...

مستر عباس: معك حق Cherie، بس انا مطول بالي كرمال هالورته...

مدام عباس: مش طايقة بقى القعدة هون، وما فرقانة بقى معي الورته، ولا السيد فاضل...

مستر عباس: فكرك انا طايق قوانين السيد فاضل وهيدا المسؤول عندو أمين

(يدخل فايق مبسوط وعم يرندح)

فايق: صباح الخير

مستر عباس: صباح الخير فايق، شايفك مبسوط

فايق: انا كتير مبسوط مستر عباس،

مدام عباس: شو يلي باسطك يا  فايق؟

فايق: يا مدام عباس، من وقت ما فت على هالقصر حياتي كلها تغيرت

مدام عباس: ما نحن متلك يا فايق عايشين بهالقصر

فايق: المشكلة يا مدام عباس: انو في 3 فئات من الناس عايشا بهالقصر: أول فئة من الناس مفكرين هالقصر حبس، بدن يطلعوا على العالم ومش قادرين. تاني فئة من الناس شايفينو فرصة عم يستفيدو منو ويعيشوا منو. وتالت فئة من الناس عم يستمتعوا بكل دقيقة بشركة حلوة مع صاحب القصر. فأنا يا مدام عباس من الفئة التالتة يلي عم استمتع بكل دقيقة بهيدي الشركة الحلوة مع صاحب القصر من خلال كتابو...

مدام عباس: يعني بدك تقلي انو انت مش فرقاني بقى معك الورتة؟

فايق: لما بتكون علاقتك حلوة مع صاحب القصر ما بتعودي مهتمة بشي تاني... عطاني او ما عطاني ورته آخر همي، وهوي بيعرف انا شو لازم آخد

مستر عباس: طيب يا فايق، يعني نحن من أي فئة طلعنا؟

فايق: انا منا شغلتي قلك، انت لازم تعرف... بس انا بحب من كل قلبي يا مستر عباس انو كل يلي بالقصر يكونوا من الفئة التالته.

مدام عباس: هيدا يلي ناقصنا انو إنت تعلمنا شو نعمل يا فايق...

فايق: بتعرفي يا مدام عباس شو هي اكبر علامة على التغيير بحياتي بهال 5 ايام؟

مدام عباس: شو هي؟؟

فايق: انو ما عم رد عليكي... والا كنت قوصتك براسك

(يدخل مستر كرباج ومدام كرباج وصوفي)

صوفي: فايق...

فايق: نعم صوفي

صوفي: أهلي بلشوا يئروا بالكتاب...

فايق: عنجد!!!

مستر كرباج:  فايق نحن سمعنا نصيحتك وبلشنا نحب هالكتاب

مدام كرباج: فيني قلك انو هوي مش متل باقي الكتب...

(يدخل أمين)

أمين: شو... عم باسمع أخبار حلوة... وأنا عم صلي انو كل المجودين يئروا هالكتاب

صوفي: فايق، ton Maman  بلشت تئرا هالكتاب؟؟

فايق: أمي!! أمي ما عم تشيل راسها عنو، عم تقرا فيه ليل نهار...

(تدخل مدام نعوس حاملا الكتاب بإيدا)

مدام نعوس: ايش هالكتاب هيدا، يا  ريت من زمان بلشت فيه...

أمين: ما هيدي كانت وصية السيد فاضل، انو الكل يقروا كتابو... ويتمتعوا بكل موجودات هالقصر... بيت عباس ما سمعنا شي بعد عنكن؟!

مدام عباس: نحن بلشنا نقرا الكتاب من زمان

مستر عباس: آآ بلشنا وكتاب حلو كتير...

أمين: طيب انا لازم بلش حضر لآخر يوم، بعد في يومين وبعتقد انو الكل لازم يكونوا مبسوطين... يلا بخاطركن

(يخرج أمين من المسرح، ثم يخرج الجميع ما عدا مدام كرباج ومدام نعوس)

(مدام نعوس بتكون طالعة من المسرح...)

مدام كرباج: مدام نعوس...

مدام نعوس: حدن حكاني... (تنظر حواليها مش متوقعة انو تحكيها مدام كرباج)

مدام كرباج: مدام نعوس... انا عم يعيطليك...

مدام نعوس: مدام كرباج عم تحكيني...

مدام كرباج: آآ انا عم بحكيكي...

مدام نعوس: نعم يا مدام كرباج؟؟

مدام كرباج: انا... انا بدي أعتذر منك يا مدام نعوس...

مدام نعوس: اكيييد بلشتي تئري بكتاب السيد فاضل...

مدام كرباج: نعم بلشت...

مدام نعوس: وانا كمان، وانا بسامحك من كل قلبي يا مدام كرباج...

(بيعبطن بعضن)

مدام نعوس: واذا عايزا اي مساعدة على الفيسبوك انا جاهزة

مدام كرباج: آآآ

مدام نعوس: عن امزح معك...

(يخرجان من المسرح)

 

  

المشهد السادس والاخير

(الكل موجود على المسرح)

أمين: هيدا اليوم الاخير، ومتل ما بتعرفوا المحامي صار واصل، لحتى يئرا الوصية...

مدام عباس:أخيراً، أخيراً وصلنا ليوم السابع... واكيد المحامي دحروج ما راح يتأخر لانو نحن قاعدين على نار

مستر عباس: استوينا يا مستر أمين...

أمين: اكيد يا مدام عباس، صار واصل

(بيدق الباب)

أمين: يا اهلا وسهلا بالمحامي دحروج...

المحامي: (يدخل مسرعاً) كلن بعدن يا أمين؟

أمين: كلن سيد دحروج، الكل بعدن...

المحامي: عظيم عظيم... اعطيني هالصندوق...

(بيعطيي الصندوق، والكل عم يتطلعوا على المحامي، بينما أمين يخرج متسللاً من المسرح)

(المحامي يفتح الصندوق بكل رواق)

مستر عباس: اسرع شوي يا مستر محامي...

المحامي: (يفتح ظرف أبيض وفيه ورقة ويفتحها) اخيراً وصلنا على الوصية، أكيد كلكن متشوقين لحتى تعرفوا شو هي؟

الكل: أكييد

المحامي: لحظة... كمان في شرط...

الكل: شووووووووووو

المحامي: عم امزح معكن، حابب اختبر قديش اعصابكن قوية...

مدام نعوس: هلق وقت مزحك يا مستر دحروج

مدام عباس: كنا رحنا فيها

مستر كرباج: حدن يعطينا كباية ماي

مدام كرباج: فيك تبلش تئرا هالوصية يا مستر دحروج...

المحامي: بالحقيقة مش انا يلي بدي اقرأ الوصية...

الكل: مش أنت؟؟؟

المحامي: (يقف وينظر الى الباب) يلي راح يقرأ الوصية هوي..... السيد.....

الكل: السيد مين؟؟؟؟

المحامي: السيد ..... فاضل

(يدخل السيد فاضل)

الكل: شوووو السيد فاضل!!!!!!!!

فاضل: نعم السيد فاضل...

مدام عباس: دخيلكن شو عم يصير؟؟؟ هووولي....

مدام نعوس: ايش هالخبرية هي؟؟

مستر كرباج: MAIS CE QUOI CA

فاضل:  انا كنت كل الوقت معكن، وعامل حالي أمين المسؤول عن القصر... وكنت دايماً شجعكن على قراءة كتاب السيد فاضل والتمتع بقصرو، وشجعكن على محبة بعضكن البعض. وكل عيلة راح تاخد نصيبها من الورتة يلي هوي... (بيحمل كتاب السيد فاضل) نسخة من كتاب السيد فاضل...

مستر عباس: شوووو؟؟ نسخة من كتاب السيد فاضل

مدام عباس: 7 ايام وكل هالنطرة... منشان كتاب؟ شو بدنا فيه لهالكتاب؟؟؟

فاضل: انتو اصلا ما ئريتوا بالكتاب ابداً يا عيلة عباس

مدام عباس: نحن، نحن كنا راح نبلش...

فاضل: خلص الوقت، ويلي ما ئري بكتابي واتغيرت حياتو ما الو نصيب بالورتة...

مدام عباس: معقولي، 7 أيام مزروبين ونطلع آخر شي بدون شي؟؟؟

مستر عباس: روحي مرتي قلتلك بلا هالمجية ضيعنا وقتنا على الفاضي

(يخرجان من القصر)

فاضل: كل واحد منكن الو نسخة من كتابي...

فايق: هيدي أحسن هدية لاحلى علقة...

(يوزع النسخ على الجميع)

فاضل: كل واحد منكن يفتح على الصفحة يلي وصل عليها...

(الكل عم يفتح كتابو)

فايق: انا وصلت بالفصل 6... شو هيدي:؟؟؟ حصتك من الورتة 6 قصور حول العالم فاضل

صوفي: انا وصلت بالفصل 5... شو؟؟؟ حصتك هي 5 قصور حول العالم

عيلة كرباج: نحن وصلنا بالفصل 2... حصتك هي قصريان حول العالم

مدام نعوس: انا بعدني بالفصل الاول... شو هيدي... حصتك من الورتة قصر واحد بالضيعة.

فاضل: تعالوا يا مباركي أبي، رثوا الملكوت المعد لكم منذ تأسيس العالم