مسرحية شعرية - السامري الصالح
دع الممثلين يستمتعون بمسرح...
لما الخوف بيزورك
عدد الممثلين: 7 أشخاص
الشخصية الأساسية هي : ي... قد تعطى أي اسم تختارونه للإمرأة
الخوف
الهم
الانهيار
الايمان
الرجاء
المحبة
الوقت: 10 - 15دقيقة
الهدف: أن نواجه الخوف وما يأتي معه بالايمان والرجاء والمحبة
تنويه: إيلي الصليبي ( esaliby68@gmail.com)
سكيتش الخوف
(يطرق الباب بينما ي تنظف البيت...تفتح الباب)
الخوف: مرحبا
ي: مرحبا، مين حضرتك؟؟
الخوف: انا الخوف... مش خايفة ....
ي: خايفة! ليش بدي خاف؟
الخوف: اولادك وين؟
(يدخل الخوف تدريجياً الى المنزل)
ي: الاولاد! راحوا بالباص على المدرسة! ليش في شي؟
الخوف: لا . بس بلكي راح الفرام بالباص ...
ي: يي يي يي دخيلكن دخيلكن ... من وين جبتلي هلق هالفكرة؟
الخوف: لازم على طول نفكر بكل الاحتمالات...
(يدخل الخوف ويجلس)
ي: ليك هلق ولا شغلة بال... يا دلي شو بدي اعمل؟
الخوف: قومي تلفني على المدرسة وشوفي وصلوا الاولاد
ي: آه معك حق هيدي فكرة . ولك شو افكارك بتريح...
الخوف: نعم لازم على طول انضل خايفين...
ي: الو المدرسة ، مين معي، السكرتيرة، دخلك بالي مشغول على الاولاد
وصلوا شي على المدرسة،؟لحظة شوي! راح تحوليني للمسؤول عن الباصات!! بس انت ما بتعرف....... ليك دغري حولتني... ليك قال حطين موسيقى فكرن حتى يهدولنا اعصابنا،
الخوف: ليش بعد في اعصاب ، يا دلي يا دلي الهيئة في شي، حتى هالقد طولوا...
ي: يلا خلصينا بقى .... الو الو مين المسؤول عن الباصات ؟؟؟ لا!! المسؤول ما
اجا اليوم ... مريض !! طيب يا خيي مع مين فينا نحكي؟
(يطرق الباب)
ي: لحظة ... خليك معي تأفتح الباب
(الخوف عم يرجف من الخوف)
الخوف: مدري شو راح يصير
(ي تفتح الباب فيدخل الهم)
الهم: مرحبا
ي: اهلا.. مين انت
الهم: انا الهم ...وحاسّك كتير مهمومة....
ي: آه... الاولاد مش عارفي اذا وصلوا على المدرسة؟؟؟
الهم: يي دخيلكن شو عم بصير؟ كيف بعدك واقفة؟ كيف بعدك مضاينة؟
(يدخل الهم ويجلس)
ي: ليش انا بعد فيني اوقف... الو الو... مين معي؟ مساعد المسؤول... دخيلك
بس بدي اعرف اذا الاولاد وصلوا على المدرسة؟؟؟؟اي اولاد؟؟؟ شو عم بمزح معك انا هلق؟؟؟باي صف اولادي؟؟ بصف الثاني؟؟؟ شو !!!!عندن رحلة اليوم على الارز....
الخوف والهم: رحلة على الارز!!!!
ي: انا ما بقى فيي اتحمل...(بتقعد الام على الكرسي) شو لازم اعمل (موجهة السؤال اليهما)
الخوف: لازم تخافي من هلق لحتى يرجعوا
الهم: لازم تنهمي من هلق لحتى يرجعوا
ي: يا دلي يا دلي كيف بدي ضايين لبعد الظهر
الخوف: متنحدث شوي عن المخاوف
الهم: واكيد عن الهموم، مثلاً : كيف قادرين تعيشوا بهيدي الايام ، عم كفيكن المعاش لآخر الشهر؟
وشو عم تعملوا بقسوطات المدارس. في عندك اجار البيت، ثياب الاولاد ، فاتورة الكهرباء التلفون الماي الاشتراك.....
ي: خلص ما بقى فيي ....
الهم: وعندك الدش كمان، كيف عم تلحقوا؟؟؟؟.
الخوف: دخلك سمعت انو هيدي السنة 2005 راح يكون في زلزال كبير بالمنطقة
الهم: آ ، سمعتا، وقال يمكن يطلع البحر ويغطي المنطقة كلها
ي: هيدا يلي كان بعد ناقصنا، يعطيكن العافية على هالاخبار
الخوف: بعدان انت متخيلا حالك بعد خمسين سنة كيف راح تكوني؟؟؟
ي: لا! ولا مرة تخيلت....
الخوف: آ... احسن ما تتخايلي... لانو شي بيفزّع..
ي: يي شو عم بيصير.. منين عم تجيبولي هالافكار....
الخوف: ما الك غير انو تخافي اكتر...
ي: يا تعتيري ... يا تعتيري
(يطرق الباب)
ي: مين هلق جايي؟
(تفتح الباب فيدخل الانهيار)
ي: وانت مين؟
الانهيار: الانهيار...
ي: الانهيار...
الانهيار: وبعدك واقفة؟؟؟؟
ي: دخيلكن هدوني....
الجميع: ما تخافي نحنا منحملك...
(تنهار ي فيحملونها ويضعونها على الطاولة)
الجميع: (ينظرون الى الجمهور ويقولون:) نجحنا...
(الكل عم يهّوولا لحتى توعى...)
(بتوعى ي من الغيبوبة...)
ي: يي ... يي....
الانهيار : (بصوت عالي) وعيتي بهالسرعة!!!!!!!!
(بترجع بتنهار ي عن جديد)
الانهيار: بسرعة بسرعة ماي ماي...
(بيكبوا ماي على وجها... بتوعا ي وحالتها حالة)
ي: دخيلكن ساعدوني ... ما بقى فيني اتحمل....
(بيقوموها عن الكرسي وهني بيقعدوا محلها)
الانهيار: راح ساعدك ... لهيدا الوضع يللي وصلتيلو ما بقى الك الا كزناكس
(بيشيل من جيبتو علبة كبيرة مكتوب عليها كزناكس)
ي: شو هيدي؟؟
الانهيار: هيدي احسن حلّة فيني اعطيكي اياها خدي هالحبة وراح ترتاحي
ي: يا رب انت ريحني دخيلك...
(قبل ان تأخذ الحبة يطرق الباب تقوم ي لتفتح، فيدخل الايمان)
ي: وانت مين؟!
الايمان: الايمان
ي: الايمان!!! تفضل...
(عندما يدخل الايمان يقف الخوف الهم الانهيار مع الحائط)
الايمان: مرحبا !!! أوووف (ناظراً اليها) هيئتك مريضة؟!
الخوف: آ... انا هلق خايف...
الايمان: شو.... عندك ضيوف غير مرغوب فيهم...ما لازم يكونوا عندك...
الهم: نحنا بس دقينا الباب...
الخوف: وهي فتحتلنا الباب...
الانهيار: ونحن فتنا... ومنيح يلي فتنا لحتى نوعيها شوي...
الهم: معقولة !!! كانت عيشة بلا هم
الخوف: وبلا خوف!!!!
الانهيار: وما كانت تعرف شو يعني الانهيار!!!!
الجميع: ولو ما نحنا هديناها كانت وقعت على الارض....
الايمان: انتو هدّيتوها؟؟
ي: صدق هني حملوني...
الايمان: آ... انا قول ليش حالتك هيك
ي: دخيلك ساعدني..
الايمان: اقعدي .. راح اعطيكي الحل...
ي: عطيوني هيدي الحبة وقال راح تريحني كتير...
الايمان: لا... هيدا الحل غلط... الحل هوي كلمة الله: الكتاب المقدس
ي: كلمة الله...
الايمان: لما يجي الخوف على بيتك، ما الك الا ان تقرأي الكتاب المقدس ، يللي مليان مواعيد لاولاده، ليك ما اجمل هيدا المزمور:
الرب نوري وخلاصي، ممن اخاف؟ الرب حصن حياتي، ممن ارتعب؟
ي: الاولاد...
الايمان: شعرة من رؤوسكم لا تهلك.
ي: و المعيشة...
الايمان: الاشبال احتاجت وجاعت، وامّا طالبو الرب فلا يعوزهم شيء من الخير.
ي: الشيخوخة والموت؟؟؟؟...
(يدق الباب)
ي: مين حضرتك؟
الرجاء: انا الرجاء... متل ما يسوع قام وصار باكورة الراقدين نحن كمان المؤمنين بيسوع راح نقوم من الاموات وراح يعطينا الرب اجساد ممجدة، وراح نكون معو بالسما على طول
الايمان: لا تهتموا بشيء، بل في كلِّ شيء بالصلاة والدعاء مع الشكر، لتعلم طلباتكم لدى الله.
الرجاء: لا اهملك ولا اتركك، الرب معينٌ لك فلا تخافي...
(بيدق الباب)
ي: مين حضرتك؟؟
المحبة: انا المحبة...
الخوف: المحبة... راحت عليي...
المحبة: لا خوف في المحبة بل المحبة الكاملة تطرح الخوف الى الخارج.
(يمسك الخوف ويطرده خارجاً)
ي: ولك شو بني ما انا حافظا هيدي الوعود كلها!! كيف نسيتها؟؟؟
الايمان: نسيتين لانو سمحتي للخوف يفوت على بيتك...
الخوف: انا ما فتت.... هي فتحتلي الباب....
ي: طيب لازم كمّل هلق تنظيف البيت؟
الجميع: هلق!!!!
ي: لانو كنت عم نظّف قبل ما يفوت حدن...(تتدل براسها على الهم الانهيار ، تحمل المكنسة وتكنس والهم والانهيار) برّا ... برّا .... ما الكن وجود ببيتي
الهم: بس انتي فتحتيلنا الباب....
ي: وانا هلق عم سكرك الباب.... برّا... (تطردهم خارجًا، يخرجوا الى الخارج)
ي: ببيتي في بس الايمان والرجاء والمحبة.
النهاية
